სინდრომი
ნათხემის ნადების სინდრომი, იგივე ტენტორიალური სინდრომი (სინონიმი: ბურდენკო-კრამერის სინდრომი) წარმოადგენს თავის ტკივილის შერწყმას თვალის კაკლების ტკივილთან, სინათლის შიშთან, ბლეფაროსპაზმთან, ცრემლდენასა და მენინგეალურ სიმპტომოკომპლექსთან. აღინიშნება ნათხემის ჭიის სიმსივნის დროს.
მკურნალობა პათოგენეზური და სიმპტომურია.
ნაღვლით ღებინების
სინდრომი
ნაღვლით ღებინების სინდრომი, იგივე დუოდენობილიარული სინდრომი (სინონიმი: მომტანი მარყუჟის სინდრომი) ვითარდება კუჭის რეზექციის შემდეგ (ბილროთ მეორით). მიზეზია მარყუჟის გადაგრეხა, გრძელი მარყუჟი, შეხორცებითი პროცესი, სტენოზი, ძირითადი ნიშანია შებერვა. აღინიშნება ტკივილი ეპიგასტრიუმში და ღებინება ნაღვლით.
მკურნალობა პათოგენეზური და სიმპტომურია.
ნაღვლის კალციფიკაციის
სინდრომი
ნაღვლის კალციფიკაციის სინდრომის ეტიოლოგია უცნობია. შესაძლოა, მიზეზი იყოს ფოსფორისა და კალციუმის მეტაბოლიზმის ადგილობრივი ან კოლოიდური წონასწორობის დარღვევა, ანდა ფერმენტთა აქტივობის დაქვეითება. რენტგენოლოგიურად შემთხვევათა 90%-ს ნაღველკენჭოვანი დაავადების თანხვედრა წარმოადგენს.
მკურნალობა პათოგენეზური და სიმპტომურია.
ნაცრისფერი
თრომბოციტების
სინდრომი
ნაცრისფერი თრომბოციტების სინდრომის კლინიკური სიმპტომებია: თრომბოციტოპენია, სპლენომეგალია, რუხი ფერის აგრანულირებული თრომბოციტები, დამახასიათებელია დიფუზური ფიბროზი ძვლის ტვინში, ელექტრონული მიკროსკოპი აჩვენებს თრომბოციტებში ალფა-გრანულების არარსებობას. ელექტროფორეზით პოლიაკრილამიდურ გულში, ასევე იმუნოელექტროფორით თრომბოციტებში არ ვლინდება თრომბოციტული თრომბოსპონდინი და ფიბრონექტინი.
მკურნალობა პათოგენეზური და სიმპტომურია.
ნეგელის სინდრომი
ნეგელის სინდრომი წარმოადგენს მემკვიდრეობითი ხასიათის ჰემორაგიულ დიათეზს, რომლიც თრომბოციტების აგლუტინაციის პროცესების დარღვევასთან არის დაკავშირებული. ახასიათებს სისხლდენის ხანგრძლივობისა და სისხლის კოლტის რეტრაქციის მკვეთრი მატება სისხლის შედედების ნორმალური მაჩვენებლის ფონზე. მემკვიდრეობის ტიპი აუტოსომურ-დომინანტურია.
მკურნალობა პათოგენეზური და სიმპტომურია.
ნეგელი-იადასონის
სინდრომი
ნეგელი-იადასონის სინდრომი - ინკონტინენცია - პიგმენტის ნაირსახეობა, რომლის დროსაც სიცოცხლის მეორე წელს ბავშვს უვითარდება სიმეტრიულ კერატოდერმიასთან შერწყმული ბადისებრი იერის პიგმენტური ლაქები. მემკვიდრეობის ტიპი აუტოსომურ-დომინანტურია.
მკურნალობა პათოგენეზური და სიმპტომურია.
ნევერგელტის
სინდრომი
ნევერგელტის სინდრომი წარმოადგენს კიდურთა განვითარების მემკვიდრეობით მანკს გადაცემის აუტოსომურ-დომინანტური ტიპით. ხშირია მშობლების ახლო ნათესაობისას. დამახასიათებელია იდაყვის სახსრების დისპლაზია, სხივ-იდაყვის სინოსტოზი, სხივისა და იდაყვის ძვლების ამოვარდნილობა, წვივის ძვლების დისპლაზია, ტერფის დიდი თითის დეფორმაცია.
მკურნალობა პათოგენეზური და სიმპტომურია.
ნევინის სინდრომი
ნევინის სინდრომი უცნობი გენეზის პრესენილური ენცეფალოპათიაა. სიმპტომები თავს იჩენს 50-70 წლის ასაკში. დამახასიათებელია: მხედველობის პროგრესული დარღვევა - სიბრმავემდე, მოძრაობებისა და მეტყველების მოშლა, ნათხემისებრი ნიშნები, ინტელექტის დაქვეითება, მიოკლონიურ კრუნჩხვათა შეტევები, მორფოლოგიურად - ტვინის უჯრედების ატროფია.
მკურნალობა პათოგენეზური და სიმპტომურია.
ნეზელოფას სინდრომი
ნეზელოფას სინდრომი (ლიმფოციტური აპლაზია, ლიმფოციტური დისგენეზია, იმუნოპარეზის ფრანგული ტიპი) მემკვიდრეობითი პათოლოგიაა, რომელსაც ახასიათებს უჯრედული იმუნიტეტის რეაქციის არარსებობა. გამოწვეულია ლიმფოციტების რაოდენობრივი უკმარისობითა და ხარისხობრივი არასრულყოფილებით (სისხლის პლაზმაში იმუნოგლობულინების ნორმალური შემცველობისას). მემკვიდრეობის ტიპი აუტოსომურ-რეცესიულია.
მკურნალობა პათოგენეზური და სიმპტომურია.
ნეიროდერმატოზული
სინდრომი
ნეიროდერმატოზული სინდრომისთვის (სინონიმები: დებრეს სინდრომი II, ჟულიენ-დებრეს სინდრომი) დამახასიათებელია მცოცავი ტკივილი მთელ სხეულში (განსაკუთრებით კიდურებში), რბილი დამბლები, ჰიპორეფლექსია, მასიური გენერალიზებული შეშუპება. გრძელდება 2-3 კვირა და შემდეგ უკუიქცევა. გვხვდება სკოლამდელი ასაკის ბავშვებში ბანალური ინფექციის შემდეგ.
მკურნალობა პათოგენეზური და სიმპტომურია.
ნეიროკუტანული
სინდრომი
ნეიროკუტანული სინდრომი, იგივე ენცეფალოტრიგემინული ანგიომატოზი, ნევოიდული ამენცია, თანდაყოლილი ნეიროეგზოდერმული დისპლაზიაა, რომლისთვისაც დამახასიათებელია ნერვული სისტემის სხვა დარღვევები, გლაუკომა.
მკურნალობა პათოგენეზური და სიმპტომურია.
ნეიროლეპტიკური
სინდრომი
ნეიროლეპტიკური სინდრომი (სინონიმი: დილვია-დენეკერის სინდრომი) თანაარსებობაა ნევროლოგიური, ფსიქიკური და ვეგეტატიური მოშლილობებისა, რომლებიც წარმოიშობა ნეიროლეპტიკური საშუალებებით მკურნალობის პერიოდში.
მკურნალობა პათოგენეზური და სიმპტომურია.
ნეიროშეშუპებითი
ეპიდემიური
სინდრომი
ნეიროშეშუპებითი ეპიდემიური სინდრომისთვის (სინონიმი: დებრე-მარის დაავადება) დამახასიათებელია თავდაპირველად შეტევითი ტკივილი, ხველა, ლარინგიტი, რომელიც 3-15 დღე გრძელდება, შემდეგ იმატებს ტემპერატურა, ვითარდება შეშუპება და დამბლები (ქვედა კიდურებისა, მენჯის სარტყლისა და ხერხემლის კუნთებისა), მყესთა რეფლექსები შენარჩუნებულია, ზურგტვინის სითხე ნორმულ მდგომარეობაშია. აღინიშნება სუნთქვისა და გულისცემის დარღვევა. გრძელდება 3-4 კვირა.
მკურნალობა პათოგენეზური და სიმპტომურია.
ნელსონის სინდრომი
ნელსონის სინდრომი ჰიპოფიზის ქრომოფილური სიმსივნეა, განვითარებული ორმხრივი ადრენალაქტომიის შემდეგ (კუშინგის სინდრომის გამო). მისთვის დამახასიათებელია: სიმსუქნე, ამენორეა, ქალებში - ჰიპერტრიქოზი, არტერიული ჰიპერტენზია, პოლიციტემია, კუნთების სისუსტე, კანის გათხელება და პროგრესული პიგმენტაცია. სისხლში მომატებულია აკტ-ის შემადგენლობა და კატექოლამინები. თურქული კეხი რენტგენოლოგიურად შეცვლილია. უვითარდება ოპერირებულ ავადმყოფთა 10%-ს.
მკურნალობა პათოგენეზური და სიმპტომურია.
ნერი-ბარეს სინდრომი
ნერი-ბარეს სინდრომი (სინონიმი: ბარე-ლიუეს სინდრომი, კისრის შაკიკი, კისრის უკანა ნაწილის სიმეტრიული სინდრომი, ხერხემლის ნერვის სინდრომი, ხერხემლის არტერიის სინდრომი) წარმოადგენს ტკივილისა და პარათეზიის შერწყმას (უმეტესად - ცალმხრივს) კისრისა და თავის არეში გარდამავალი თავბრუხვევით, ყურებში შულით, მხედველობის დაქვეითებით. აღინიშნება კისრის ოსტეოქონდროზის, კისრის ტრავმის ან სიმსივნის დროს, რაც იწვევს ზეწოლას ხერხემლის არტერიასა და მის სიმპათიკურ წნულზე.
მკურნალობა პათოგენეზური და სიმპტომურია.
ნეფროზული სინდრომი
ნეფროზული სინდრომი წარმოადგენს მასიურ პროტეინურიას (ცილის დღიური დანაკარგი - 3,5 გ და მეტი), ჰიპო- და დისპროტეინემიას, რომელსაც თან ახლავს სახისა და სხეულის შეშუპება. აღინიშნება თირკმელების დაავადებების, სისტემური დაავადებების და სხვათა დროს.
მკურნალობა პათოგენეზური და სიმპტომურია.
ნეცელოფის სინდრომი
ნეცელოფის სინდრომი (სინონიმი: დე ჟორჟეს სინდრომი) თანდაყოლილ ანომალიათა კომპლექსია აუტოსომურ-რეცესიული გადაცემით. შემადგენელი დაზიანებებია: პარაფარისებრი ჯირკვლებისა და თიმუსის აპლაზია, აორტის რკალის ანომალია, იმუნური სისტემის სისუსტე, კრუნჩხვები. სისხლში აღინიშნება ლიმფოციტოპენია, ჰიპოკალციემია, ჰიპოგამაგლობულინემია. შესაძლოა დაერთოს კატარაქტა, საზარდულის თიაქარი.
მკურნალობა პათოგენეზური და სიმპტომურია.
ნივერგელტის სინდრომი
ნივერგელტის სინდრომი (სინონიმი: ნივერველტერბის სინდრომი) წარმოადგენს ჩონჩხის კიდურთა განვითარების სისტემურ თანდაყოლილ, მემკვიდრეობით მანკებს. დამახასიათებელია: მხრის სახსრების განუვითარებლობა, სინოსტოზი სხივისა და იდაყვის ძვლებს შორის, ამოვარდნილობები მხრის სახსარში, წვივის განუვითარებლობა, ფეხმრუდობა, დიდი თითების დეფორმაცია.
მკურნალობა პათოგენეზური და სიმპტომურია.
ნიკოლა-მუტო-შარდეს
სინდრომი
ნიკოლა-მუტო-შარდეს სინდრომი წარმოადგენს ეპიდერმისის აშრევების თანდაყოლილ ფორმას. ზოგიერთი ბუშტუკის ძირი წყლულდება ან განიცდის მეჭეჭოვან პროლიფერაციას. ბუშტუკები შესაძლოა გაჩნდეს ზედა სასუნთქ გზებში ან კუჭ-ნაწლავის ტრაქტის ზედა ნაწილში, რამაც შესაძლოა მათი დავიწროება გამოიწვიოს.
მკურნალობა პათოგენეზური და სიმპტომურია.
ნილსენის სინდრომი I
ნილსენის სინდრომი I (ნილსენის თანდაყოლილი დისტროფია) წარმოადგენს ხერხემლის განვითარების მრავლობითი ანომალიის, მისი კისრის ნაწილის მოძრაობის შეზღუდულობის შეუღლებას ბეჭის ძვლების მაღლა დგომასა და კასრისებურ გულმკერდთან.
მკურნალობა პათოგენეზური და სიმპტომურია.
ნილსენის სინდრომი II
ნილსენის სინდრომი II წარმოადგენს გადაჭარბებული ფიზიკური დატვირთვის შედეგად განვითარებულ თირკმელზედა ჯირკვლის უკმარისობას. მისთვის დამახასიათებელია: ძლიერი სისუსტე, ფიზიკური უძლურება, ფსიქომოტორული მოუსვენრობა, კუნთების ფასციკულური მოძრაობები, ეიფორია. დასვენების შემდეგ სიმპტომები ქრება. პროგნოზი კარგია.
ნირჰოფ-ჰუბრენის
სინდრომი
ნირჰოფ-ჰუბრენის სინდრომი წარმოადგენს მემკვიდრეობითი ენქონდრული მეტაფიზული დიზოსტოზის ვარიანტს გადაცემის, სავარაუდოდ, აუტოსომურ-დომინანტური ტიპით. დამახასიათებელია მიკრომელია, კრუნჩხვის შეტევები, ჰიპერაზოტემია. რენტგენოლოგიურად - ლულოვანი ძვლების, ნეკნებისა და ხერხემლის მეტაეპიზარულ ნაწილთა განვითარების დარღვევა. შედეგი ლეტალურია.
ნიფერგელტის სინდრომი
ნიფერგელტის სინდრომი მემკვიდრეობითი პათოლოგიაა გადაცემის აუტოსომურ-დომინანტური ტიპით. ვლინდება იდაყვის სახსრის დისპლაზიით, სხივ-იდაყვის სინოსტოზით, სხივისა და იდაყვის ძვლების ამოვარდნილობითა და ქვეამოვარდნილობით, წვივის დისპლაზიით, მისი მცირე ძვლის შედარებითი შემცირებით, ტერფის გამრუდებით და დიდი თითების დეფორმაციით.
მკურნალობა პათოგენეზური და სიმპტომურია.
ნიფციგერის სინდრომი
ნიფციგერის სინდრომი (წინა კიბისებრი კუნთის სინდრომი, კიბისებრი კუნთის სინდრომი, სკალენუეს სინდრომი) წარმოადგენს კისრის არეში ტკივილის შერწყმას მხარის ზემოთ და ხელში, იდაყვის მხარეს, ტკივილთან, ხელის პერიფერიულ პარეზთან (უპირატესად - დისტალურ ნაწილებში), მტკივნეულობასთან პალპაციის დროს წინა კიბისებრი კუნთის მიმაგრების ადგილას, სხივის არტერიაზე პულსის დასუსტებასთან, ადგილობრივ ვეგეტატიურ სისხლძარღვოვან დარღვევებთან. გამოწვეულია ლავიწქვეშა არტერიაზე ზეწოლით და მხრის წნულის ლავიწქვეშა ნაწილის კისრის მალებქვეშ ზეწოლით ან ანომალიურად განლაგებული პირველი ნეკნითა და შეკუმშული კიბისებრი კუნთით.
მკურნალობა პათოგენეზური და სიმპტომურია.
ნოაკის სინდრომი
ნოაკის სინდრომი - I ტიპის აკროცეფალოპოლისინდაქტილია, აკროცეფალია, პოლიპლუსდაქტილია, პლუს სინდაქტილია - მემკვიდრეობითი პათოლოგიაა, ახასიათებს აკროცეფალია, სინდაქტილია და გადიდებული ქვედა კიდურთა თითების გაორება. მემკვიდრეობის ტიპი აუტოსომურ-დომინანტურია.
მკურნალობა პათოგენეზური და სიმპტომურია.
ნოთნაგელის სინდრომი
ნოთნაგელის სინდრომი გამოიხატება ნათხემისებური ატაქსიით, თვალის მამოძრავებელი ნერვის დამბლით, ცენტრალური წარმოშობის ცალმხრივი ან ორმხრივი სიყრუით. ზოგჯერ თან ახლავს ქორეოფორმული ან ატეტოიდური ტიპის ჰიპერკინეზი, ქვედა კიდურების პარეზი ან დამბლა ან თავის VII-XII წყვილი ნერვის ცენტრალური პარეზი. გვხვდება შუამდებარე ტვინის სახურავის ამა თუ იმ პათოლოგიური პროცესით (სისხლძარღვოვანი, სიმსივნური, ანთებითი) დაზიანებისას.
მკურნალობა პათოგენეზური და სიმპტომურია.
ნოკემანის სინდრომი
ნოკემანის სინდრომი წარმოადგენს მემკვიდრეობითი ანომალიების ერთობლიობას, სავარაუდოდ, გადაცემის აუტოსომურ-დომინანტური ტიპით. დაავადება მჟღავნდება ორი-ოთხი წლის ასაკში ხელისგულებისა და ფეხისგულების კერატოზით, ხელის მტევნების, იდაყვებისა და მუხლების ძვლებზე მეჭეჭოვანი წარმონაქმნებით. შემდეგ ამას ემატება სხვა ძვლების ცვლილებები, ღარები ხელისა და ფეხის თითებზე, სმენის დაქვეითება (მიზეზია შუა ყურის ანომალია), თვით სიყრუემდეც კი.
მკურნალობა პათოგენეზური და სიმპტომურია.
ნონეს კომპრესიული
სინდრომი
ნონეს კომპრესიული სინდრომი (სინონიმები: ფროენის სინდრომი, ფროენ-ნონეს სინდრომი), იგივე ლიქვორული ბლოკადის სინდრომი, წარმოადგენს ზურგტვინის სითხეში ცილის მომატების შეუღლებას ქსანთოქრომიასთან და ზოგჯერ - უმნიშვნელო ციტოზთან. გამოწვეულია ზურგის ტვინის სუბარაქნოიდულ სივრცეში გამტარობის დარღვევით. ვითარდება, მაგალითად, ექსტრამედულარული სიმსივნეების, პაქიმენინგიტის დროს.
მკურნალობა პათოგენეზური და სიმპტომურია.
ნორის სინდრომი
ნორის სინდრომი მემკვიდრეობითი პათოლოგიაა რეცესიული ტიპის სქესთან შეჭიდული გადაცემით. ვლინდება მხოლოდ ახალშობილ ბიჭუნებში, ხშირად აქვს ოჯახური ხასიათი. ვლინდება თვალის პათოლოგიით (თვალის ბუშტის შიგნითა გარსის განვითარების მანკი), სიყრუით და გონებრივი ჩამორჩენილობით. თანდათანობით ვითარდება კატარაქტა, უვეიტი, თვალის კაკლის ატროფია, რქოვანას შემღვრევა.
მკურნალობა პათოგენეზური და სიმპტომურია.
ნორმალური
კორონარული არტერიის
სპაზმის სინდრომი
ნორმალური კორონარული არტერიის სპაზმის სინდრომი - ამ დიაგნოზს უსვამენ ავადმყოფებს, რომელთაც კლინიკურად აქვთ სტენოკარდიის ესა თუ ის ფორმა, მაგრამ გამოკვლევით კორონარულ სისხლძარღვთა სკლეროზი არ უდასტურდებათ.
მკურნალობა პათოგენეზური და სიმპტომურია.
ნუნანის სინდრომი
ნუნანის სინდრომი (სინონიმები: ტერნერის მცირე სინდრომი, ულრიფის მცირე სინდრომი, ულრიჰ-ტერნერის ფსევდოსინდრომი) წარმოადგენს მემკვიდრეობითი ანომალიების კომპლექსს გადაცემის აუტოსომურ-დომინანტური ტიპით. მისთვის დამახასიათებელია: ფილტვის არტერიის სარქვლების სტენოზი, ტანდაბლობა, ჰიპერტელორიზმი, ქუთუთოების ფთოზი, ეპიკანთუსი, კრიპტორქიზმი, მუცლის სწორი კუნთების დიასტაზი, ჩონჩხების დეფორმაცია, გონებრივი ჩამორჩენილობა, ანდროტროპიზმი.
მკურნალობა პათოგენეზური და სიმპტომურია.
