მორგანის სინდრომი I წარმოადგენს სირინგომიელიის ფორმას, რომელიც გამოიხატება ნევრალგიით, შემდგომი პარეზებით, მგრძნობელობის დარღვევით, მრავლობითი უმტკივნეულო პანარიციუმით, რასაც მოჰყვება ფალანგების განგრენა, დამახინჯება, ცვლილებები სახსრებში, ხერხემლის რიგიდულობა.
მკურნალობა პათოგენეზური და სიმპტომურია.
მორგანის სინდრომი II
მორგანის სინდრომი II წარმოადგენს ქვედა კიდურების სპასტიკურ დამბლას, რომელიც მიმდინარეობს მგრძნობელობისა და მენჯის ორგანოთა ფუნქციების დარღვევის გარეშე. ეს სინდრომი უვითარდებათ ბავშვებს 4-დან 12 წლამდე.
მკურნალობა პათოგენეზური და სიმპტომურია.
მორგანის სინდრომი III
მორგანის სინდრომი III-ისთვის დამახასიათებელია საერთო კუნთოვანი სისუსტე, ფიბრილური მოძრაობები უპირატესად წვივის კუნთებში, ვეგეტატიური დარღვევები (ოფლიანობა, ტაქიკარდია, არტერიული წნევის მომატება), ფსიქიკური დარღვევები (დეპრესიული მდგომარეობა, შიში, სუიციდური ტენდენციები). აღინიშნება ზოგიერთი ინფექციური დაავადების, რევმატიზმის, ინტოქსიკაციების დროს. იგივეა, რაც მორგანის ქორეა.
მკურნალობა პათოგენეზური და სიმპტომურია.
მორიაკის სინდრომი
მორიაკის სინდრომი უვითარდებათ მხოლოდ ბავშვებსა და მოზარდებს (ზრდის პერიოდში). გამოიხატება მძიმედ მიმდინარე შაქრიანი დიაბეტით, აციდოზისა და ინსულინრეზისტენტობისკენ მიდრეკილებით. დათრგუნულია ზრდის პროცესი, სქესობრივი განვითარება. თან ახლავს ღვიძლის გადიდება (გლიკოგენის და ცხიმის დიდი რაოდენობით ჩალაგების გამო), ოსტეოპოროზი. ხშირად წარმოადგენს არასწორად ნამკურნალევი შაქრიანი დიაბეტის შედეგს.
მკურნალობა პათოგენეზური და სიმპტომურია.
მორისის სინდრომი
მორისის სინდრომი (სინონიმები: გოლდბერგ-მაქსველის სინდრომი, გოლდბერგ-მორისის სინდრომი) წარმოადგენს მემკვიდრეობით მამრობით ფსევდოჰერმაფროდიტიზმს. გამოიხატება მდედრობითი ფენოტიპით, პირველადი ამენორეით, სასქესო გათმიანების უქონლობით. გარეთა სასქესო ორგანოების განვითარება ქალურია, მოკლე და ბრმა ვაგინით, შიდა სასქესო ორგანოები - მამრობითი, სათესლე მილაკების ინფანტილური განვითარებით. სქესობრივი ქრომატინი მამრობითია.
მკურნალობა პათოგენეზური და სიმპტომურია.
მორკიოს სინდრომი
მორკიოს სინდრომი (სინონიმები: ბრეილსფირდ-მორკიოს სინდრომი, ულრი-მორკიოს სინდრომი) მუკოპოლისაქარიდოზია. მიეკუთვნება მემკვიდრეობით დაავადებათა რიცხვს გადაცემის აუტოსომურ-რეცესიული ტიპით. კლინიკურად გამოიხატება დისპროპორციული დაბალი ან ჯუჯისებრი ტანით, მოკლე კისრითა და წელით, ქათმის მკერდით, კიფოზით, კიფოსკოლიოზით, X-ისმაგვარი ფეხებითა და ბრტყელტერფიანობით; დაზიანებულია კბილის მინანქარი. გენეტიკური დეფექტი პირველად რეალიზაციას პოვებს შემაერთებელ ქსოვილში მუკოპოლისაქარიდების მოჭარბებული ჩალაგებით და შარდთან კერატანსულფატისა და დერმანტასულფატის გამოყენების ზრდით, რასაც თან სდევს ეპიფიზური ხრტილების დაშლა, ლულოვანი ძვლების მეტაფიზების გაგანიერება და დამოკლება, ხერხემლის მალების გაბრტყელება.
მკურნალობა პათოგენეზური და სიმპტომურია.
მორტენსენის სინდრომი
მორტენსენის სინდრომი (სინონიმი: რევოლის დაავადება ანუ სინდრომი) წარმოადგენს ესენციურ ჰემორაგიულ თრომბოციტემიას, ჰიპერთრომბოციტულ მიელოზს, ესენციური თრომბოციტემიისა და ჰემორაგიული დიათეზის შეუღლებას. მისთვის დამახასიათებელია: სისხლდენა ცხვირიდან, კუჭიდან და ნაწლავებიდან, სპლენომეგალია, თრომბოზები და თრომბოფლებიტები, ჰიპერპროტეინემია, ერითროციტოზი, ჰიპერჰემოგლობინემია, ლეიკოციტოზი, თრომბოციტოზი, მეტაკარიოციტოზი. უვლინდება ხანში შესულებს.
მკურნალობა პათოგენეზური და სიმპტომურია.
მოურიენ-კუნის სინდრომი
მოურიენ-კუნის სინდრომი წარმოადგენს თანდაყოლილ ტრაქეობრონქომეგალიას დივერტიკულოზით. ეს არის ტრაქეისა და მთავარი ბრონქების გაფართოება, რომლის დროსაც ხშირია ქოშინი, ქრონიკული განმეორებითი (მორეციდივე) პნევმონია. შესაძლოა სპონტანური პნევმოთერაპიაც.
მკურნალობა პათოგენეზური და სიმპტომურია.
"მოუღუნავი ადამიანის"
სინდრომი
"მოუღუნავი ადამიანის" სინდრომი უცნობი ეტიოლოგიის პათოლოგიაა. ახასიათებს კუნთების პროგრესული რიგიდულობა, უპირატესად - ტანის კუნთების მტკივნეული სპაზმით, რასაც მოძრაობის, უპირველესად კი ხერხემლის შეზღუდვამდე მივყავართ.
მკურნალობა პათოგენეზური და სიმპტომურია.
მოხსნის სინდრომი
მოხსნის სინდრომი - ეს არის ორგანიზმის რეაქციათა კომპლექსის კლინიკური გამოვლინება ზოგიერთი სამკურნალო საშუალების მოხსნის პასუხად. მაგალითად, კოტიკოსტეროიდებით ხანგრძლივი მკურნალობისას მათი მიღების სწრაფი ან უეცარი შეწყვეტისას მოსალოდნელია განვითარდეს თირკმელზედა ჯირკვლების მწვავე უკმარისობა (`გაზარმაცებული~ ჯირკვალი ვერ ასწრებს ფუნციური აქტივობის დროულ აღდგენას).
მკურნალობა პათოგენეზური და სიმპტომურია.
მრავლობითი
პროლაბირების სინდრომი
მრავლობითი პროლაბირების სინდრომი ეწოდება ორკარიანი, სამკარიანი და აორტული სარქვლების ერთდროულ პროლაბირებას. მეოთხე სარქვლის იმავდროული პროლაბირება ლიტერატურაში არ არის აღწერილი. ამ დროს მოსალოდნელია სხვადასხვა გართულება (უმეტესად - ინფიცირება).
მსხვილი ნაწლავის
გაღიზიანების სინდრომი
მსხვილი ნაწლავის გაღიზიანების სინდრომისთვის კლინიკურად დამახასიათებელია კუჭის მოქმედების დარღვევა (ფაღარათისა და შეკრულობის მონაცვლეობა), აირის მომატებული რეფლექსი წვრილი ნაწლავიდან კუჭში, მტკივნეული შეგრძნებები მუცელში, ტკივილის დროს მიდრეკილება ფაღარათისკენ, მდგომარეობის გაუმჯობესება კუჭის მოქმედების შემდეგ, მუცლის შებერვა და სხვა.
მკურნალობა პათოგენეზური და სიმპტომურია.
მუნიე-კუნის სინდრომი
მუნიე-კუნის სინდრომი გამოიხატება კანის სისხლძარღვთა მსხვრევადობითა და კუნთების სისუსტით. წარმოადგენს ელერს-დანლოსის სინდრომის ტიპს, როცა სახსარში ამოვარდნილობას, მოძრაობის მომატებასა და კანის ელასტიკურობის გაძლიერებას ერთვის შინაგან ორგანოთა ისეთი დაზიანებანი, როგორიცაა დიაფრაგმის თიაქარი, საყლაპავისა და სასუნთქი ტრაქტის ექტაზია.
მკურნალობა პათოგენეზური და სიმპტომურია.
მუნის სინდრომი
მუნის სინდრომი (სინონიმები: ჰეტჩინსონის სინდრომი, ბიმონდის სინდრომი, ლორენს-მუნ-ბიდლ-როზაბალის სინდრომი, ლორენს-მუნ-ბიდლის სინდრომი, ლორენს-მუნ-ჰეტჩინსონის სინდრომი, როზაბალის სინდრომი) ვლინდება თანდაყოლილი სქესობრივი და ცხიმოვანი ცვლის დარღვევებით (ფრეილიხის ადიპოზოგენიტალური დისტროფიის მსგავსად - პიგმენტური რეტინიტით, სინდაქტილიით ან პოლიდაქტილიით, გონებრივი განუვითარებლობით (ოლიგოფრენიით). თან ახლავს განვითარების მრავალი სხვა დეფექტიც მხედველობის მხრივ (სიბრმავემდე), გულის თანდაყოლილი მანკები, სმენის დაქვეითება, სიყრუე, ქვედა კიდურთა სპასტიკური დამბლები, სახსრებში მოძრაობის სიფართის მომატება, მემკვიდრეობითი დიენცეფალურ-რეთინული დეგენერაცია.
მკურნალობა პათოგენეზური და სიმპტომურია.
მურის სინდრომი
მურის სინდრომი (აბდომინალური შაკიკი, მუცლის შაკიკი, მუცლის ეპილეფსია) - ეს არის ნაწლავის შეტევითი გაძლიერებული მოტორიკა თავის ტვინის გაღიზიანების შედეგად. მისთვის დამახასიათებელია: მუცლის პაროქსიზმული გაფანტული ტკივილი, პროდრომულ პერიოდში - გულისრევა, ღებინება, ფაღარათი, სიფითრე, ყურყური მუცელში, შეტევის დროს მუცლის კუნთების კლინური შეკუმშვა. შეტევის შემდეგ - ძილიანობა, მოთენთილობა. ელექტროენცეფალოგრამაზე ვლინდება ცერებრული დიზრიტმია.
მკურნალობა პათოგენეზური და სიმპტომურია.
მუხლის სახსრის
ფუნქციური სინდრომი
მუხლის სახსრის ფუნქციური სინდრომი - ახალგაზრდა ქალები არცთუ იშვიათად მიმართავენ ექიმს მუხლის სახსრის ტკივილის გამო. ხშირად ეს სინდრომი სპონტანურად ქრება 25-30 წლის ასაკში. როგორც გამოკვლევებმა აჩვენა, ამის მიზეზი ის არის, რომ ახალგაზრდა ქალები მოძრაობის დროს საკმარისად არ ტვირთავენ იმ კუნთებს, რომლებიც უზრუნველყოფს გარეთა როტაციას.
ერთადერთი სამკურნალო საშუალებაა მანუალური კინეზითერაპია.
მწვავე აბდომინური
სინდრომი
მწვავე აბდომინური სინდრომი მოიცავს საკმაოდ ბევრ სინდრომს, რომელთა გამო საავადმყოფოში მოჰყავთ მუცლის ღრუს ორგანოთა მწვავე ქირურგიული დაავადებების კლინიკით. ასეთებია: კუჭის კომური ატონია, დიაბეტური გასტროპარეზი, ცრუ მწვავე მუცლის სინდრომი, კუჭ-ნაწლავის ჰემორაგიული სინდრომი, მწვავე წყლული, დიაბეტური კომის კუჭ-ნაწლავის ფორმა და სხვა.
მკურნალობა პათოგენეზური და სიმპტომურია.
მხარ-ბეჭის სინდრომი
მხარ-ბეჭის სინდრომისთვის დამახასიათებელია ნეიროვასკულარული დარღვევები, მამოძრავებელი აპარატის ტროფიკული ფუნქციის პათოლოგიური გამოვლინებები მარცხენა მხრის სახსარზე, კუნთებსა და მყესებზე. კლინიკურად გამოიხატება მარცხენა მხრის, გულმკერდის კუნთებისა და ხელის ინტენსიური ტკივილით. ტკივილი ძლიერდება ხელის მოძრაობისას, სიცივეზე, პალპაციისას. საჭიროა დიფერენცირება სტენოკარდიისა და პოსტინფარქტული სინდრომისგან.
მკურნალობა პათოგენეზური და სიმპტომურია.
მხარ-ხელ-ტერფის
სინდრომი
მხარ-ხელ-ტერფის სინდრომი (სინონიმი: სტეინბროკერის სინდრომი) წარმოადგენს ტკივილისა და ვეგეტატიური ტროფიკული ძვრების შერწყმას მხრის სახსარსა და ხელის მტევანში. ვითარდება კისრის ოსტეოქონდროზის, მხრის სახსრის პერიართრიტის დროს.
მკურნალობა პათოგენეზური და სიმპტომურია.
მხედველობის ბორცვის
სინდრომი
მხედველობის ბორცვის სინდრომი (სინონიმი - დეჟერან-რუსის სინდრომი, თალამური სინდრომი) წარმოადგენს მძაფრი მუდმივი ან შეტევისმაგვარი მზარდი ტკივილის შერწყმას ჰიპერპათიასთან, ზედაპირული მგრძნობელობის დაქვეითებასა და მგრძნობელობის ღრმა გამოვარდნასთან, სენსიტიურ ჰემიატაქსიასთან, ხელების ატიპურ მდგომარეობასთან (თალამური ხელი), მიმიკის დარღვევებთან სიცილისა და ტირილის დროს, მაშინ როდესაც მიმიკური კუნთების თვითნებური მოძრაობები შენარჩუნებულია. აღინიშნება თალამუსის დაზიანების დროს.
მკურნალობა პათოგენეზური და სიმპტომურია.
მხრის სინდრომი
მხრის სინდრომი პოსტინფარქტული სინდრომის ნაირსახეობაა. მისთვისდამახასიათებელია ტკივილი მხრის სახსარში, უმეტესად - მარცხნივ. ზოგჯერ ერთდროულად შეინიშნება მხრის სახსრის კუნთების ზომიერი ატროფია და სახსრის ზედაპირის დისტროფიული ცვლილებები.
მკურნალობა პათოგენეზური და სიმპტომურია.
მხრის წნულის
ქვედა ნაწილის
სინდრომი
მხრის წნულის ქვედა ნაწილის სინდრომი (სინონიმი: დეჟერინ-კლუმპკეს დამბლა ანუ სინდრომი) წარმოადგენს მაჯისა და წინამხრის ხელისგულის მხრის კუნთების პერიფერიულ დამბლას. გამოხატულია მგრძნობელობითი მოშლილობა იდაყვისა და შუა ნერვების ინერვაციის ზონაში. ხელის დისტალურ ნაწილში ვაზომოტორული დარღვევები შეინიშნება. ვითარდება კისრის VII და VIII და გულმკერდის I ზურგტვინის ნერვის დაზიანების დროს.
მკურნალობა პათოგენეზური და სიმპტომურია.
